នៅសណ្ឋាគារ The Gread Duke នាព្រឹកថ្ងៃអង្គារ ៨រោច ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៩ ខែវិច្ឆិកា ឆ្នាំ២០១៩ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចុះហត្ថលេខាលើឯកសារអនុស្សរណៈនៃការ យោគយល់គ្នាស្តីពី "ការជំរុញការងារស្រាវជ្រាវ និងការប្រើប្រាស់គ្រឿងយន្តកសិកម្ម និងបច្ចេក វិទ្យាកសិកម្មវៃឆ្លាត" ជាមួយក្រុមហ៊ុនវិទ្យាសាស្រ្តធន់ធ្ងន់ និងបច្ចេកវិទ្យា Zoomlion នៃសាធា រណរដ្ឋប្រជាមានិតចិន ដែលពិធីនេះស្ថិតក្រោមអធិបតីភាពឯកឧត្តម ស៊ុន ចាន់ថុល ទេសរដ្ឋ មន្ត្រី រដ្ឋមន្ត្រីក្រសួងសាធារណ:ការ និងដឹកជញ្ជូន និងឯកឧត្តម DU Jiahao សមាជិកគណ: កម្មាធិការមជ្ឈឹមបក្ស និងជាលេខាធិការគណ:កម្មាធិការបក្សកុម្មុយនីស្តចិនខេត្តហ៊ូណាន និងមានការចូលរួមពីឯកឧត្តមថ្នាក់ដឹកនាំក្រសួង ស្ថាប័នពាក់ព័ន្ធ សភាពាណិជ្ជកម្មកម្ពុជា វិស័យឯកជន លោក លោកស្រី និងក្រុមប្រតិភូអញ្ជើញមកពីខេត្តហ៊ូណាន។

ភ្ជាប់ជាមួយព្រឹត្តិការណ៍នាពេលនេះ ឯកឧត្តមរដ្ឋមន្ត្រីបានរំឭកជូនភ្ញៀវអំពីប្រវត្តិនៃកិច្ចសហប្រតិ បត្តិការការទូតជាផ្លូវការកម្ពុជា-ចិន ដែលបានចាប់បដិសន្ធិឡើងនៅឆ្នាំ១៩៥៨ ហើយឆ្នាំ២០១៩ គឺជាខួបលើកទី៦១ឆ្នាំនៃថ្ងៃបង្កើតទំនាក់ទំនងការទូតនេះ ដែលភាគីទាំងពីរបានកំណត់ថាជា “ឆ្នាំមិត្តភាពកម្ពុជា-ចិន មិត្តចាស់ មិត្តដែកថែប” ព្រមទាំងកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ដែលភាគីទាំងពីរបានចុះហត្ថលេខានៅឆ្នាំ២០១៣។ លទ្ធផលនៃកិច្ចសហប្រតិបត្តិការនេះ បានផ្តល់ផលប្រយោជន៍យ៉ាងធំធេងដល់ប្រជាជនកម្ពុជា ជាពិសេសគឺបានចូលរួមយ៉ាង សកម្មទៅលើការអភិវឌ្ឍន៍ហេដ្ឋារចនាសម្ព័ន្ធ កិច្ចសហប្រតិបត្តិការលើវិស័យកសិកម្មនិងវិស័យផ្សេងៗទៀត ស្របពេលដែលរាជរដ្ឋាភិបាលបានដាក់ចេញនូវគោលនយោ បាយក្នុងការធ្វើទំនើបកម្មវិស័យកសិកម្មឲ្យមានលក្ខណៈប្រកួតប្រជែង បរិយាប័ន្ន ធន់នឹងការប្រែ ប្រួលអាកាស ធាតុ និងនិរន្តរភាព ដើម្បីបង្កើនប្រាក់ចំណូលគ្រួសារកសិករ វិបុលភាព និងសុខុមាលភាពរបស់ប្រជាពលរដ្ឋកម្ពុជា តាមអភិក្រមនិងវិសាលភាពថ្មី ដើម្បីប្រែក្លាយវិស័យនេះ ពីដំណាក់កាលផលិតកម្មតាមបែបយថាផល ឈានទៅផលិតកម្មប្រពលវប្បកម្ម លើកកម្ពស់ផលិតភាព ពិពិធភាវូបនីយកម្មដំណាំ សត្វ និងវារីវប្បកម្មដែលមានសក្តានុពល និងមានតម្រូវការទីផ្សារ។ ជាការពិត កត្តាទាំងអស់នេះ គឺជាចលករជំរុញ និងគាំទ្រយ៉ាងពេញលេញដល់ចក្ខុវិស័យរបស់រាជរដ្ឋាភិបាលដែលចង់ប្រែក្លាយកម្ពុជាឲ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងកម្រិតខ្ពស់នៅឆ្នាំ២០៥០។

ជាថ្មីម្តងទៀត ឯកឧត្តមរដ្ឋមន្ត្រីឆ្លៀតយកឱកាសនេះបញ្ជាក់ជូនភ្ញៀវជ្រាបថាឯកសារអនុស្សរណៈនៃការយោគយល់គ្នាដែលមានខ្លឹមសារដូចបានជម្រាបជូនខាងលើ ប្រាកដណាស់វានឹងជួយបំពេញតួនាទីយ៉ាងសំខាន់ក្នុងការចូលរួមអនុវត្តគោលនយោបាយ និងផែនការអភិវឌ្ឍន៍វិស័យកសិកម្មឆ្នាំ២០១៩-២០២៣ និងជាពិសេសយុទ្ធសាស្រ្តចតុកោណដំណាក់កាលទី៤ របស់រាជ រដ្ឋាភិបាល ក្តោបន័យជារួមគឺត្រូវធ្វើយ៉ាងណាជំរុញកំណើនកសិកម្ម និងបង្កើនការនាំចេញផលិត ផលកសិកម្មប្រកបដោយគុណភាព និងសុវត្ថិភាព តាមរយៈការលើកកម្ពស់ផលិតភាពកសិកម្ម បង្កើនតម្លៃបន្ថែម និងពង្រីកការប្រកួតប្រជែងទីផ្សារប្រកបដោយនិរន្តរភាព។ ដោយឡែក ក្នុងក្របខ័ណ្ឌនៃការអនុវត្តអនុស្សរណៈនៃការយោគយល់គ្នាស្តីពីការជំរុញការស្រាវជ្រាវ និងអនុវត្តគ្រឿងយន្តកសិកម្ម និងបច្ចេកវិទ្យាកសិកម្មនេះ ឯកឧត្តមរដ្ឋមន្ត្រីបានឲ្យអគ្គនាយកដ្ឋានកសិកម្ម នាយកដ្ឋានសហប្រតិបត្តិការអន្តរជាតិនៃក្រសួងកសិកម្ម រុក្ខាប្រមាញ់ និងនេសាទ និងក្រុមហ៊ុនបង្កើតក្រុមការងារដើម្បីជំរុញការអនុវត្តសកម្មភាពមានប្រសិទ្ធភាពខ្ពស់។